हेल्थ टिभी अनलाइन\ डडेल्धुरा :  बैतडीमा थप एकजनाको आरडीटी रिपोर्ट पोजेटिभ आएको छ। शनिबार आरडीटी टेस्ट गर्दा सिगास गाउँपालिकाको श्रीभावर क्वारेन्टाइनमा बसेका ३३ बर्षीय पुरुषको आरडीटी रिपोट पोजेटिभ आएको हो।

सिगास गाउँपालिका–९ चौखामका ती पुरुषको आरडीटी रिपोर्ट पोजेटिभ आएपछि उनलाई आइसोलेसनमा राखिएको स्वास्थ्य कार्यालय बैतडीका प्रमुख योगेशप्रसाद भट्टले जानकारी दिए। आरडीटी पोजेटिभ आएका ती युवकको आइतबार थ्रोट स्वाब संकलन गरेर पीसीआर परीक्षणका लागि धनगढी पठाइने उनको भनाइ छ।

ती युवक गत वैशाख १८ गते झुलाघाट नाकाबाट स्वदेश भित्रिएका थिए। बैतडीमा यसअघि बिहीबार डिलाशैनीका ५० बर्षीय एक पुरुषको पनि आरडीटी रिपोट पोजेटिभ आएको थियो। ती व्यक्तिको थ्रोट स्वाब संकलन गरेर पीसीआर परीक्षणका लागि धनगढी पठाइएको भएपनि रिपोर्ट भने आउन बाँकी रहेको बताइएको छ।