हेल्थ टिभी अनलाइन\ काठमाडौं : सरकारले कोरोनाको उच्च जोखिममा रहेको भन्दै कालीमाटी फलफूल तथा तरकारी बजारका व्यक्तिहरुको नमुना परीक्षण गरेको छ । इपिडिमियोलोजी तथा रोग नियन्त्रण महाशाखाबाट खटिएको टोलीले आज आरडीटी र पीसीआर दुबै विधिमार्फत नमुना संकलन गरेको छ ।

महाशाखाका निर्देशक डा बासुदेव पाण्डेले उपत्यकामा उच्च जोखिममा भएका क्षेत्रका १० हजार मानिसहरुको नमुना परीक्षण गर्ने लक्ष्य अनुरुप आज  कालीमाटी तरकारी बजारमा १ हजार ३४ जनाको नमुना परीक्षण गरिएको बताए । परीक्षण गरिएका मध्ये तीन जनाको आरडीटी परीक्षण पोजेटिभ आएको छ । आरडीटी पोजेटिभ आउने तीनै जनाको पीसीआर परीक्षणका लागि स्वाब संकलन भइसकेको बताइएको छ ।

आज कालीमाटी बजारका तरकारी व्यापारी एवं ढुवानी कर्ता लगायतका गरी ७ सय जनाको आरडीटी विधिमार्फत र ३ सय ३४ जनाको पीसीआर विधिमार्फन परीक्षण गरिएको डा पाण्डेले जानकारी दिए । उनीहरुको रिपोर्ट शुक्रबार बिहानसम्म आउने बताइएको छ ।