हेल्थ टिभी अनलाइन\काठमाडौं: स्वास्थ्य तथा जनसंख्या मन्त्रालयले कोरोना सम्बन्धी सूचनामा गम्भीर लापरवाही गरेको छ ।

हिजोकै रिपोर्टलाई थप भन्दै विज्ञप्ति जारी गर्दा समेत मन्त्रालयले माफी समेत मागेको छैन्। आजै दुइपटक निकालिएको विज्ञप्तिमा मन्त्रालयका सह-प्रवक्ता डा समीरकुमार अधिकारीले हस्ताक्षर गरेका छन्।

विज्ञप्ति बनाउने बेलासम्म प्रवक्ताले यतिसम्म पनि ख्याल नगर्नु दुखद हो, मन्त्रालयका एक कर्मचारीले भने । यस्तो गम्भीर सूचना ‘भेरीफाइ’ नै नगरी कसरी बाहिर आउँछ उनले प्रश्न गरे ।

इपिडिमियोलोजी तथा रोग नियन्त्रण महाशाखाले थप ५ जनाको कन्ट्याक्ट ट्रेसिङ गर्ने भन्दै खोजी गर्न थालेपछि बल्ल सह प्रवक्तालाई हिजोकै रिपोर्ट भन्ने थाहा भएको ती कर्मचारीले बताए ।

मन्त्रालयले बिहान पहिलो पटक २ र दोस्रो पटक ५ गरी ७ जना कोरोना संक्रमित थपिएको भन्दै एक घण्टा पनि नहुँदै दुईवटा विज्ञप्ति निकालेको थियो । तर उक्त सूचनामा दोस्रो पटक ५ जना थपिएको भनिएको सूचना गलत रहेको भन्दै  त्रुटि सच्याएको छ।

पछिल्लो विज्ञप्तिमा मन्त्रालयले हालसम्म २४५ जना मात्र संक्रमित रहेको जनाएको छ । मन्त्रालयले जारी गरेको विज्ञप्तिका आधारमा विभिन्न राष्ट्रिय अन्तराष्ट्रिय मिडियाले समाचार बनाइसकेका छन्।