हेल्थ टिभी अनलाइन\ काठमाडौं:  कोरोना संक्रमण भएर विराटनगरको कोशी अस्पताल अन्तर्गतको कोरोना विशेष अस्पतालमा भर्ना भएका ६ जना संक्रमित आज अस्पतालबाट डिस्चार्ज भएका छन्। उदयपुरको भुल्केस्थित एक मस्जिदमा रहेका उनीहरुमा कोरोना संक्रमण पुष्टि भएपछि गत बैशाख ५ र ६ गते अस्पताल भर्ना भएका थिए । उनीहरुमध्ये ६ जना आज डिस्चार्ज भएका हुन् ।

उनीहरुसँगै संक्रमण पुष्टि भएका बाँकी ७ जनामा भने अझै पोजेटिभ रिपोर्ट देखिएपछि उनीहरु भने डिस्चार्ज हुन पाएनन्।  अस्पतालले १३ जना संक्रमितको अस्पताल भर्नापछिको १४ दिनमा पहिलो स्वाब गत शुक्रबार संकलन गरेको थियो । पहिलो स्वाबमा ६ जनामा नेगेटिभ र ७ जनामा पोजेटिभ देखिएको थियो । त्यसपछि दोस्रो र तेस्रो स्वाब संकलन गरेर परीक्षण गर्दा समेत ६ जनामा नेगेटिभ नै देखिएपछि उनीहरुको डिस्चार्ज गर्न सिफारिस गरिएको अस्पतालले जनाएको छ ।

उनीहरुलाई डिस्चार्ज गरिएको भएपछि १४ दिनसम्म क्वारेन्टाइनमा बस्न भनिएको छ ।