हेल्थ टिभी अनलाइन \काठमाडौं:  नेपालगंजमा आज कोरोना पुष्टि भएका संक्रमितलाई खजुरास्थित सुशील कोइराला प्रखर क्यान्सर अस्पतालको आइसोलेसनमा लगिएको छ ।

भेरी अस्पतालमा स्वाब संकलन गरी परीक्षण गर्दा उनमा कोरोना पोजेटिभ देखिएको हो । नेपालगंज वडा नं ८ का ६० वर्षीय पुरुषलाई को बाट कोरोना सरेको हो भन्ने एकिन नभएको बाँकेका सहायक प्रमुख जिल्ला अधिकारी दीर्घराज उपाध्यायले जानकारी दिए ।

उनले भने, ‘उहाँलाई खजुरास्थित क्वारेन्टाइनमा लगिएको छ अब डिटेल लिंदैछौं ।’ उनले संक्रमित व्यक्ति लकडाउन शुरु हुनुभन्दा अघि नै भारतको बहराइचबाट आएको भनिए पनि एकिन भइनसकेको बताए । उनले आजै सबै जानकारी लिइने र उनको सम्पर्कमा आउने सबैको स्वाब संकलन गरी परीक्षण गरिने बताए ।

योसँगै नेपालगंजका अर्का एक व्यक्तिमा पनि भेरी अस्पतालमा गरिएको परीक्षणमा कोरोना रिपोर्ट शंकास्पद आएपछि उनलाई पनि सोही अस्पतालको आइसोलेसनमा राखिएको छ । यद्यपी उनको पुन: नमुना परीक्षणका लागि टेकुस्थित राष्ट्रिय जनस्वास्थ्य प्रयोगशालामा पठाइएको र रिपोर्ट आउन बाँकी रहेको बताइएको छ ।