हेल्थ टिभी अनलाइन \काठमाडौं:  सरकारले कोरोनाको आशंकामा देशभरका अस्पतालमा ८७ जना आइसोलेसनमा रहेको बताएको छ ।

शनिबार स्वास्थ्य तथा जनसंख्या मन्त्रालयले गरेको नियमित मिडिया ब्रिफिङमा मन्त्रालयका प्रवक्ता डा विकास देवकोटाले ८७ जना आइसोलेसनमा रहेको बताएका हुन्। उनले उपत्यकामा ३ जना र उपत्यका बाहिर ८४ जना रहेको बताए । यसैगरी शनिबारसम्म विभिन्न देशबाट आएका र सम्भावित संक्रमित भन्दै क्वारेन्टाइनमा रहनेको संख्या १४हजार ७ सय ३१ जना रहेको छ ।

यसैगरी २४ घण्टामा १ हजार ९ सय ४५ जनाको कोरोनाको आशंकामा परीक्षण भएको प्रवक्ता देवकोटाले जानकारी दिए । यो सँगै नेपालमा कोरोनाको परीक्षणको संख्या ४९ हजार ३ सय ३६ पुगेको छ। उनले शनिबार कसैमा पनि कोरोना पोजेटिभ रिपोर्ट नआएको पनि जानकारी दिए ।

शुक्रबार झापामा भेटिएका  संक्रमितको कन्टयाक्ट ट्रेसिङ गर्ने काम भइरहेको बताए । उनलाई एक महिना अघि दुबईबाट आएका छोराबाट कोरोना सरेको आशंका गरिएको छ ।

नेपालमा हालसम्म ४९ जनामा कोरोना संक्रमण पुष्टि भएको छ भने १२ जना उपचारपछि निको भएर घर फर्केका छन्।