शेर भण्डारी \डडेल्धुरा: सप्तरीमा भएको एक धार्मिक सभामा सहभागी भएर फर्केका कैलालीका पाँच जनालाई प्रहरीको टोलीले आज साँझ धनगढीका बिभिन्न स्थानबाट उद्दार गरी सेती प्रादेशिक अस्पताल पुर्‍याएको छ ।

मुस्लिम जमाती समूहका उनीहरु सप्तरीमा भएको धार्मिक सभामा सहभागी भएर फर्केको बताइएको छ । दिल्लीमा भएको धार्मिक सभामा लकडाउनका कारण सहभागी हुन नपाएका उनीहरु सप्तरीमा भएको सभामा सहभागी भएका थिए ।

प्रहरीले धनगढी उपमहानगरपालिका—१ पशुपति टोलबाट ३ जना, चटकपुर र चौराहाबाट एक एक जनालाई उद्दार गरी उनीहरुको थ्रोट स्वावको नमूना परीक्षणका लागि सेती प्रादेशिक अस्पताल लगिएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक दक्षकुमार बस्नेतले बताए ।

सप्तरीमा आयोजित धार्मिक सभाबाट सहभागी भएका अत्तरीयाबाट दुई जनाको पनि उद्दार भईरहेको छ । मुस्लिम जमातीहरुमा कोरोनाको संक्रमण पाईएकोले प्रहरीले उनीहरुको खोजी गर्दै आज साँझ उद्दार गरेको हो ।