हेल्थ टिभी अनलाइन \डडेल्धुरा:  डडेल्धुरास्थित डडेल्धुरा अस्पतालबाट भागेका दुई जनाको कोरोना भाइरस (कोभिड–१९) परीक्षणको रिपोर्ट ‘नेगेटिभ’ आएको छ।

कोरोनाको आशंका गरिएका उनीहरु भागेपछि अस्पतालमा खैलाबैला मच्चिएको थियो । अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले उनीहरुको नमुना परीक्षण गर्न काठमाडौं पठाइएको र आज रिपोर्ट नेगेटिभ आएका बताए ।

कोरोना संक्रमणको आशंकामा डडेल्धुरा अस्पतालको आइसोलेसन वार्डमा भर्ना गरिएका उनीहरु शनिबार दिउँसो अस्पतालबाट भागेका थिए। उनीहरु कुनै जानकारी बिना अस्पतालबाट गएको डा विष्टले जानकारी दिए ।

उनीहरु चैत २५ गते अस्पतालमा भर्ना भएका थिए। दुवै जनामा ज्वरो र सुख्खा खोकी पाइएपछि कोरोना संक्रमणको आशंकामा सोही दिन स्वाब परीक्षणका लागि नमुना संकलन गरेर चैत २६ गते काठमाडौं पठाइएको थियो।

अस्पतालबाट भागेका उनीहरूहरु भागेश्वर गाउँपालिका ३ नानीगाडका स्थानीय हुन्। उनीहरू आमा–छोरा रहेको पनि अस्पतालले जनाएको छ । केही दिनअघि मात्र छोरा भारतबाट आएको बताइएको छ ।