हेल्थ टिभी अनलाइन \काठमाडौं:  बेलायतका प्रधानमन्त्री बोरिस जोनसनको स्वास्थ्यमा सुधार आएपछि उनलाई आइसीयूबाट वार्डमा सारिएको छ । कोरोना संक्रमण भएका जोनसनलाई संक्रमणको दशौं दिनमा श्वासप्रश्वासमा समस्या आएपछि अस्पतालको आइसीयू कक्षमा सारिएको थियो ।

उनको स्वास्थयमा सुधार आएको तर केही दिन अस्पतालमै रहने डाउनिङ्ग स्ट्रीटले जनाएको छ। कोरोनाभाइरसको सङ्क्रमण देखिएका जोनसन गत आइतवारदेखि लण्डनस्थित सेन्ट टमसेज अस्पतालमा उपचार गराइरहेका छन्। जोनसनलाई बिहीवार साँझ सघन उपचार कक्षबाट वार्डमा सारिएको र त्यहाँ उनलाई डाक्टरहरूले निकटमा रहेर निगरानी गर्ने जनाइएको छ।

कोरोनाभाइरसको सङ्क्रमण देखिएको १० दिनपछि गत आइतवार प्रधानमन्त्री जोनसनलाई अस्पताल पुर्‍याइएको थियो र त्यसको भोलिपल्ट उनलाई सघन उपचार कक्षमा सारिएको थियो। उपचारका क्रममा जोनसनलाई अक्जिसन दिइएको भए पनि भेन्टिलेटरमा भने नराखिएको डाउनिङ्ग स्ट्रीटले यसअघि जनाएको थियो।

उनको स्वास्थ्य स्थितिमा क्रमिक सुधार आएको र उपचारका क्रममा आफूले पाएको उत्कृष्ट सेवाका लागि उनले एनएचएसलाई धन्यवाद दिएको प्रवक्ताले बताए।