हेल्थ टिभी अनलाइन\काठमाडौं : प्रधानमन्त्री केपी शर्मा ओलीले स्वघोषणा गरेर जनप्रतिनिधिहरू र स्वास्थ्यकर्मीको सम्पर्कमा जान विदेशबाट फर्किएकाहरूलाई आग्रह गरेका छन्।

सोमवार राष्ट्रका नामा सम्बोधन गर्दै प्रधानमन्त्री ओलीले कतिपयले क्वारेन्टाइनमा बस्न गरिएको आग्रहलाई ध्यान नदिएको भन्दै यस्तो आग्रह गरेका हुन्। ‘स्वघोषणा गरेर जनप्रतिनिधि र स्वास्थ्यकर्मीको सम्पर्कमा जानुहोस्’, उनले आग्रह गरे, ‘तपाईँहरूको लापरवाही स्वयं परिवार र समुदायका लागि महँगो पर्नसक्छ।’

सम्बोधनका क्रममा ओलीले कोरोना संक्रमणको महामारीबाट देश र जनतालाई सुरक्षित राख्‍न सरकार लागिपरेको बताए। उनले नेपाल–भारत सीमानजिक आइपुगेका नेपालीहरूले भोग्नुपरेको अप्ठ्यारोलाई सरकारले बुझेको बताए।

सङ्क्रमणको जोखिमलाई न्यून गर्न अन्तर्राष्ट्रिय सीमामा आवतजावत बन्द गर्नैपर्ने बाध्यता रहेको उनको भनाइ छ। सीमा क्षेत्रको क्वारेन्टाइनमा रहेका नेपालीहरूलाई निश्चित अवधि पूरा गरेपछि स्वास्थ्य परीक्षण गरेर भित्र्याउने ओलीले बताए।

ओलीले स्वास्थ्य सामग्री खरिदको जिम्मा नेपाली सेनालाई दिने निर्णयको बचाउ पनि गरे। अहिले सबैभन्दा चुनौती स्वास्थ्य उपकरणहरूको आपूर्ति भएको उनले बताए।