हेल्थ टिभी अनलाइन\काठमाडौं : स्वास्थ्य तथा जनसंख्या मन्त्रालयले काठमाडौँ उपत्यकाका ५० शय्याभन्दा बढीका सरकारी तथा निजी अस्पताललाई तत्काल आवश्यक नपर्ने सेवा चैत मसान्तसम्म बन्द गर्न निर्देशन दिएको छ।

स्वास्थ्य मन्त्री भानुभक्त ढकालको अध्यक्षतामा बिहीबार बसेको बैठकले कोरोना भाइरस संक्रमणको सम्भावित जोखिम र यसको व्यवस्थापनको तयारीका लागि भन्दै यस्तो निर्णय गरेको हो।

बैठकले १०० शय्यामाथिका सबै अस्पताललाई फिभर क्लिनिक सञ्चालन गर्न यसअघि दिएकाे निर्देशन कार्यान्वयन भए\नभएको अनुगमन गर्न समितिलाई निर्देशन दिएको छ।

बैठकले कोरोना भाइरसको समुदायमा फैलावटको अवस्था पत्ता लगाउन राष्ट्रिय जनस्वास्थ्य प्रयोगशालालाई कम्तीमा २० हजार स्याम्पल टेष्टको लागि तयारी अवस्थामा राख्‍न निर्देशन दिएको छ।

उपचारपछि घर जान नचाहने चिकित्सकहरूका लागि छुट्टै आवासको व्यवस्था गर्न पनि मन्त्रालयले निर्देशन दिएकाे छ।