हेल्थ टिभी अनलाइन\काठमाडौं : नेपाल चिकित्सक संघले कोरोना भाइरस संक्रमणको विषयमा त्रासमा नबस्न र आवश्यक तयारी गर्न सुझाव दिएको छ।

संघले सोमवार विज्ञप्ति निकालेर कोरोना संक्रमण फैलिन नदिन र जोखिम न्यूनीकरणका लागि अस्पतालहरुको पहिचान गरी न्यूनतम पूर्वाधार, उपकरण र जनशक्तिको व्यवस्था गर्न सरकारसँग आग्रह गरेको हो।

संघले उपचारका लागि तोकिएका अस्पतालहमा रहेका अन्य बिरामीहरूलाई अन्य अस्पतालमा स्थानान्तरण गर्ने वातावरण मिलाउन पनि आग्रह गरेको छ । विश्व स्वास्थ्य संगठनको चेतावनी र छिमेकी मुलुकमा देखिएको अवस्थालाई मध्यनजर गर्दै सरकारी तयारी पूर्वतयारी कमजोर देखिएको भन्दै संघले सरकारको ध्यानाकर्षणसमेत गरेको छ।

संघले सम्भाव्य जोखिम न्यूनीकरण तथा ल्याब टेष्टको दायरा बढाउन आवश्यक औषधि, उपकरण र जनशक्तिको व्यवस्था गर्न संघले सरकारसँग आग्रह गरेको छ। विमानस्थल र सीमा नाकामा हुने जाँचलाई प्रभावकारी र व्यवस्थित बनाएर नेपाल प्रवेश गर्ने व्यक्तिहरूको निगरानी राख्ने र थप जाँच तथा उपचारको प्रबन्ध गर्नुपर्ने संघको भनाइ छ।

अध्यक्ष डा. लोचन कार्की र महासचिव बद्री रिजालद्वारा हस्ताक्षरित विज्ञप्तिमा संघले सरकारलाई पर्ने आवश्यक सहयोग गर्न आफू तयार रहेको बताएको छ।