हेल्थ टिभी अनलाइन\सुर्खेत : कर्णाली प्रदेश अस्पताल सुर्खेतले कोरोना भाइरसको संक्रमण देखिएमा आइसोलेसन र क्वारेन्टाइनको व्यवस्था गरेको जनाएको छ।

शनिबार मुख्यमन्त्री महेन्द्रबहादुर शाही र सामाजिक विकासमन्त्री दल रावलसहित सरोकारवालाले गरेको निरीक्षण तथा अनुगमनका क्रममा प्रदेश अस्पतालका मेडिकल सुपरिटेन्डेण्ट प्रा.डा. डम्बर खड्काले आइसोलेसन र क्वारेन्टाइन दुवै तयारी अवस्थामा रहेको जानकारी दिए।

‘कोरोनाको संक्रमण देखिएमा २५ आइसोलेसन कक्ष र १०० जना क्षमताका लागि क्वारेन्टाइन कक्षा तयार गरेका छौँ’, प्रा.डा. खड्काले भने, ‘त्यस्तो जटिल परिस्थिति आइपरे पनि सामना गर्ने क्षमता निर्माण गरेका छौँ।’

मुख्यमन्त्री शाहीले कोरोनाविरुद्ध गर्ने प्राविधिक तयारी पूर्णरूपले गर्न अस्पतालसँग आग्रह गर्दै आवश्यक बजेट प्रदेश सरकारले उपलब्ध गराउने जानकारी दिए।

सामाजिक विकासमन्त्री रावलले मन्त्रालयले कोराना संक्रमण समस्या समाधानका लागि ५० लाख रुपैयाँ छुट्याएको बताए। अस्पतालमा क्वारेन्टाइन जाँचका लागि ११ कार्डियाक मनिटर राखिसकिएको र तत्काल १५० शय्या राख्ने तयारी गरिएको छ।