हेल्थ टिभी अनलाइन\सुर्खेत : यहाँका ४० हजार बालबालिकालाई दादुरा रुबेला रोगविरुद्धको खोप लगाइने भएको छ। चैत १ गतेदेखि सञ्चालन हुने अभियानअन्तर्गत यहाँका नौ स्थानीय तहका बालबालिकालाई खोप लगाउन लागिएको हो।

दादुरा र रुबेला रोगविरुद्धको खोप अभियान प्रभावकारी बनाउन तीन चरणमा सञ्चालन गरिने जिल्ला जनस्वास्थ्य कार्यालयका जनस्वास्थ्य प्रमुख चेतननिधि वाग्लेले जानकारी दिए।

‘पहिलो चरणमा चैत १ गतेदेखि ६ गते वीरेन्द्रनगर नगरपालिका, दोस्रो चरणमा चैत ८ देखि १५ सम्म सिम्ता गाउँपालिका, गुर्भाकोट नगरपालिका, पञ्चपुरी नगरपालिका र चौकुने गाउँपालिकामा अभियान सञ्चालन हुनेछ’, उनले भने, ‘तेस्रो चरणमा चैत १५ देखि १९ सम्म चिङ्गाड गाउँपालिका, भेरीगंगा नगरपालिका, लेकवेंशी नगरपालिका र बराहताल गाउँपालिकामा खोप अभियान सम्पन्न गरिनेछ।’

उनका अनुसार सुर्खेतमा ५८० खोप केन्द्रमा १७० खोपकर्मी र एक हजार १६० स्वयंसेवक परिचालन हुनेछन्। दादुरा र रुबेला नौ महिनादेखि पाँच वर्षमुनिका सबै बालबालिका र जन्मेदेखि पाँच वर्षमुनिका बालबालिकालाई पोलियो खोप लगाउने कार्यालय प्रमुख वाग्लेले बताए।