हेल्थ टिभी अनलाइन\पाल्पा : माथागढी गाउँपालिकाले गर्भवती लक्षित ‘पोषणका लागि अण्डा उपहार’ कार्यक्रम सञ्चालन गरेको छ। ‘उपाध्यक्ष आमा सुरक्षा : गर्भवतीलाई अण्डा, घरमा हरियो झण्डा’ कार्यक्रमअन्तर्गत गर्भवतीलाई अण्डा उपहार दिन थालेको हो ।

नियमित स्वास्थ्य जाँच गराउन प्रेरित गर्ने र पोषणयुक्त खानामा समेत ध्यान पुर्याउने भएकाले नियमित गर्भजाँच गराउनेलाई गाउँपालिकाले अण्डा उपहार अभियान सञ्चालन गरेको गाउँपालिकाका अध्यक्ष सन्तोष थापामगरले जानकारी दिए।

अभियानबाट गर्भ परीक्षणका लागि स्वास्थ्य संस्थामा जानेको संख्या बढ्न थालेको पाइएको छ। संस्थागत सुत्केरी प्रोत्साहन रकम वितरण गर्दै आएको गाउँपालिकाले याे वर्षदेखि अण्डा र झण्डा अभियानलाई पनि सँगसँगै अगाडि बढाएको छ।

यस कार्यक्रमको लागि गाउँपालिकाले चार लाख रकम विनियोजन गरेको जनाइएको छ। ‘अझै पनि महिला स्वास्थ्य संस्थामा जान हिचकिचाउने पनि यदाकदा छन्, उनीलाई नियमित स्वास्थ्य संस्थामा गएर गर्भ परीक्षण गराउने बानी बसाल्न अण्डा उपहार कार्यक्रम ल्याएका हौँ’, उनले भने।

गर्भ रहेको सामान्यतया चार महिनादेखि नौ महिनासम्म गर्भ जाँच गर्न आउँदा स्वास्थ्य संस्थामार्फत नै अण्डा वितरण गर्न थालिएको छ। गर्भवती महिला स्वास्थ्य संस्थामा नै गर्भ परीक्षणका लागि पुगेपछि ३५० रूपैयाँ बराबरको अण्डा दिन थालिएको छ।

स्वास्थ्य संस्थामा नै सुत्केरी हुने महिलालाई प्रतिव्यक्ति  दुई हजार ५०० रूपैयाँ प्रोत्साहनस्वरूप दिने गरेको रुप्से स्वास्थ्यचौकीका प्रमुख यमबहादुर चिदीले जानकारी दिए।