हेल्थ टिभी अनलाइन \काठमाडौं:  स्वास्थ्य तथा जनसंख्या मन्त्रालयले कोरोना प्रभावित देशबाट आउने सबै यात्रुलाई सेल्फ क्वारेन्टाइन फारम भर्नुपर्ने नियम लागु गरेको छ ।

मन्त्रालयका सह प्रवक्ता सागर दाहालले अबदेखि कोरोना प्रभावित देशबाट आउने सबै यात्रुले यो फारम भर्नुपर्ने बताए । उनले यसरी फारम भर्दा व्यक्तिगत सम्पूर्ण जानकारी भर्नुपर्ने भएकाले सबैको रेकर्ड राख्न सजिलो हुने जानकारी दिए । उनले भने, ‘यो फारमका कारण यदि कसैमा कोरोना पोजेटिभ देखिएमा ठेगाना सहितको सबै जानकारी हुने भएकाले छिटो उपचारमा ल्याउन सजिलो हुनेछ । हाम्रो उद्देस्य पनि त्यही हो ।’

सरकारले कोरोना प्रभावित देशबाट आउनले आफै १४ दिनसम्म क्वारेन्टाइनमा रहनुपर्ने बताएको छ । यो फारम हरेक जहाजमा उपलब्ध हुने पनि दाहालले जानकारी दिए ।  यात्रुले यो फारम अनिवार्य रुपमा भरेर हेल्थ डेस्कमा बुझाउनुपर्ने हुन्छ ।

यस्ता छन् सेल्फ क्वारेन्टाइनमा बस्नेले पालना गर्नुपर्ने नियमहरु:

सकेसम्म छुट्टै कोठामा बस्ने, त्योे सम्भव नभए अर्को व्यत्तिसंग एक मिटरको दुरीमा रहने गरी बस्ने ।
छुट्टै बाथरुमको प्रयोग गर्ने ।
आफनो कोठा आफै सफा गर्ने।
सार्वजनिक स्थानमा नजाने ।
आफूले प्रयोग गरेका सामान अरुलाई प्रयोग गर्न नदिने ।
स्वास्थ्य संस्थामा जान परे मास्कको प्रयोग गर्ने ।
नियमित साबुन पानीले हात धुने ।
नियमित शरीरको तापक्रम लिने ।
केही समस्या आएमा सम्बन्धित स्वास्थ्यकर्मीलाई जानकारी दिने ।