इरानमा नयाँ कोरोना भाइरसको संक्रमणबाट विगत २४ घण्टामा ५४ जनाको मृत्यु भएको छ।

एकै दिन कोरोनाको संक्रमणबाट यति ठूलो संख्यामा मानिसको मृत्यु भएको पहिलो घटना भएको अधिकारीहरूले बताएका छन्।

पछिल्लो मृत्युसँगै इरानमा कोरोना संक्रमित भई मर्नेहरूको संख्या २९१ जना पुगेको स्वास्थ्य मन्त्रालयका प्रवक्ता कियानुस जहानपोरले बताए।

उनले कोरोना संक्रमित व्यक्तिहरुको संख्या निरन्तर बढेको बताउँदै पछिल्लो पटक ८८१ जनामा कोरोना भएको पुष्टि भएको जानकारी दिए। इरानमा अब संक्रमित व्यक्तिको संख्या आठ हजार ४२ पुगेको छ। अहिलेसम्म दुई हजार ७३१ जना निको भएर घर फर्किसकेका छन्।

कोरोनाको संक्रमणबाट सर्वाधिक प्रभाव राजधानी तेहरानमा परेको छ, जहाँ दुई हजार ११४ जना संक्रमित भएका छन्। क्यास्पियन सागरसँग सीमा जोडिएको लोकप्रिय पर्यटकीय क्षेत्र मजान्दारान प्रान्तमा ८८६ जना तथा क्वोममा ७५१ जनामा कोरोनाको संक्रमण देखिएको छ ।

इरानले अझैसम्म आधिकारिक रूपमा मानिसहरुलाई क्वारेन्टाइनमा रहन बाध्य बनाएको छैन, तर अधिकारीहरूले मानिसहरूलाई अनावश्यक यात्रा नगर्न तथा यात्रा निरुत्साहित गर्ने उद्देश्यले होटल बन्द गर्न आदेश दिएको छ ।