हेल्थ टिभी अनलाइन\काठमाडौं : नेपाल औषधि उत्पादक संघले ६ महिनासम्म औषधि अभाव नहुने प्रतिक्रिया दिएको छ।

शुक्रवार पत्रकार सम्मेलन गरी संघले औषधिको विषयमा आत्तिइहाल्नुपर्ने अवस्था नरहेको बताएको हो। संघका निवर्तमान अध्यक्ष दिपकप्रसाद दाहालले जनवरीमा मात्रै ३८ मेट्रिक टन पारासिटामोल आएको जानकारी दिए।

संघका महासचिव  विप्लव अधिकारीले नेपाल ७५ प्रतिशत औषधिमा आत्मनिर्भर रहेको बताए। अधिकारीले अप्ठ्यारो अवस्थामा सरकारले विदेशमा माग्नुभन्दा नेपाली उद्योगीलाई प्रोत्साहन गर्नुपर्ने तर्क गरे। हारगुहार गर्नुपर्ने अवस्था नरहेको उनको भनाइ छ।

‘सरकारले प्रोत्साहन गर्ने हो भने दुई वर्षमा नेपाली औषधि उद्योगलाई पूर्णरूपले आत्मनिर्भर बनाउन सकिन्छ’, उनले भने। भारतले पनि २६ प्रकारका औषधि र कच्चा पदार्थको निर्यातमा प्रतिबन्ध लगएपछि नेपाली बजारमा औषधि अभाव हुनसक्ने अनुमान गरिरहँदा संघले वस्तुस्थिति जानकारी गराएको हो।