हेल्थ टिभी अनलाइन दैलेख : जिल्लामा स्वास्थ्य बिमा कार्यक्रम शुरु भएको छ। जिल्ला समन्वय समितिका प्रमुख प्रेम थापालगायत १५ जनालाई स्वास्थ्य बिमा गरेर कार्यक्रमको औपचारिक शुरुआत गरिएको हो।

निर्वाचित जनप्रतिनिधि, सरकारी कर्मचारीलगायतको उपस्थितिमा बिमा औपचारिक शुरुआत गरिएकाे हाे। आम नागरिकको घरदैलोमा पुगेर बिमा गराउने काम प्रभावकारी बनाउन जिल्ला समन्वय समितिका प्रमुख थापाले बताए।

उनले दैलेखका ११ वटै स्थानीय तह र ९० वडामा खटिएका सहयोगी कार्यकर्ताहरूले आम नागरिकलाई बीमा अभियानमा समावेश गरेर एक लाख रुपैयाँसम्मको सुविधा पाउने अवसरबाट वञ्चित नगराउन सुझाव दिए।

बिमा अभियानअन्तर्गत ‘क’ वर्गका अपांगता, ज्येष्ठ नागरिक, एचआईभी संक्रमित, कुष्ठरोग र क्षयरोगका बिरामीलाई निःशुल्क बीमा गरिनेछ। स्वयंसेविकालाई ५० प्रतिशत छुट दिइएको छ। एकाघरका एकदेखि पाँचजनालाई तीन हजार ५०० रूपैयाँ र पाँचजनाभन्दा बढी भए प्रतिएकजना बराबर रु ७०० का दरले वार्षिक प्रिमियम लाग्ने जानकारी छ।