कोरोना भाइरस (कोभिड–१९)को कारण इरानमा पछिल्लो २४ घण्टामा थप ११ जनाको मृत्यु भएको छ। पछिल्लो तथ्यांकसँगै इरानमा कोरोना भाइरसका कारण मृत्यु हुनेको सङ्ख्या ७७ पुगेको स्वास्थ्य मन्त्रालयले बताएको छ ।

समाचार अनुसार इरानका २३ जना सांसदलाई कोरोना भाइरस संक्रमणको पुष्टि भएको स्थानीय सञ्चारमाध्यमले जनाएका छन् ।

इरानमा कुल दुई हजार ३३६ व्यक्तिमा संक्रमण पुष्टि भएको र विगत २४ घण्टामा ८३५ नयाँ संक्रमित भेटिएको इरानी स्वास्थ्य अधिकारीहरूले बताए। इरानमा एकै दिन कोरोना भाइरसका कारण यति धेरै सङ्क्रमित भेटिएको यो पहिलो दिन हो ।

दुई हप्ता पहिले पहिलो घातक यस भाइरसको संक्रमण पुष्टि भएपछि नियन्त्रणका लागि आन्तरिक स्रोत र साधनको अधिकतम प्रयोग गरी काम भइरहेको इरानी उप–स्वास्थ्यमन्त्री अलिरेजा राइसीले बताए।

‘पछिल्लो २४ घण्टामा थप ८३५ जनामा कोभिड–१९ को संक्रमण पुष्टि भएको छ र योसँगै इरानमा सङ्क्रमितको सङ्ख्या दुई हजार ३३६ पुगेका छ । घातक यो भाइरस सङ्क्रमणका कारण ७७ जनाको मृत्यु भएको छ।’