हेल्थ टिभी अनलाइन\चितवन : भरतपुर महानगरपालिकाले सुर्तीजन्य वस्तुको बिक्रीवितरण स्थलको दैनिक अनुगमन शुरु गरेको छ।

आगामी डिसेम्बरमा महानगरपालिकालाई धूमपानरहित शहर (स्मोक फ्री सिटी) बनाउने पहलस्वरूप महानगरपालिकाले तयारी थालेको हो।

अनुगमन टोलीले शैक्षिक संघसंस्था, सरकारी कार्यालय, अस्पताल बालगृहलगायत निकाय आसपासका क्षेत्रमा हुने सुर्तीजन्य पदार्थको बिक्री भए\नभएको अनुगमन गरिरहेको छ। शैक्षिक संघसंस्था, अस्पताल लगायतका निकायको १०० मिटरको वरपर सुर्तीजन्य पदार्थ बिक्री वितरण गर्न ऐनले रोक लगाएकाले त्यसको कार्यान्वयमा महानगरका अधिकारीहरू जुटेका हुन्।

महानगरका उपसचिव प्रद्युम्नप्रसाद उपाध्यायकोे नेतृत्वमा प्रत्येक दिनजसो बजार अनुगमन भइरहेको छ। अनुगमनका क्रममा ३५ पसलमध्ये १३ पसलमा यस्ता सामग्री पाइएको र चुरोट सेवन गर्दै गरेका दुईजनालाई कारवाही गरेको उनले बताए।

महानगरप्रमुख रेणु दाहालका अनुसार धूमपानरहित शहर घोषणा गर्न समिति निर्माण गरी हरेक महिनाको एक दिन बैठक बसेर गृहकार्य शुरु गरिएको छ। गत असाेजमा इण्डाेनेसियाको बोगरमा भएको कार्यक्रममा उनले भरतपुर महानगरलाई ‘स्मोक फ्री’ सिटी बनाउने प्रतिबद्धता जनाएकी थिइन्।