हेल्थ टिभी अनलाइन \काठमाडौं: चीनको वुहानबाट १७५ जना नेपालीलाई उद्धार गर्न गएका विमानका चालक सहित १८ जनाको टोलीमा कोरोना भाइरस नभेटिएको स्वास्थ्य मन्त्रालयले जनाएको छ ।

आइतबार स्वास्थ्य मन्त्रालयमा आयोजित पत्रकार सम्मेलनमा स्वास्थ्य सचिव खगराज बरालले  चीन गएका विमान चालक र अन्य सदस्यसहित १८ जनामा दोस्रो चरणको जाँच गर्दा पनि कोरोना भाइरस नदेखिएको बताए । उनीहरुलाई क्वारेन्टाइनमा राखिएको १४औं दिन अर्थात हिजो  पुन: कोरोना परीक्षण गर्दा रिपोर्ट नेगेटिभ आएको हो ।

यो सँगै १५ दिनको क्वारेन्टाइनपछि उनीहरु आजै क्वारेन्टाइन मुक्त हुने पनि उनले जानकारी दिए ।  चालकसहितको १८ जनाको टोलीलाई नगरकोटमा  क्वारेन्टाइनमा राखिएको थियो । उनीहरुले १५ औँ दिनमा आज परिवार भेट्न पाउने छन्। अन्य १७५ जना विद्यार्थीहरुको रिपोर्ट भने सोमबारसम्म आउने मन्त्रालयले जनाएको छ ।