हेल्थ टिभी अनलाइन\लमजुङ : बेँसीशहर नगरपालिका–६ चण्डीस्थानमा सञ्चालित पाठेघर शिविरमा ११४ जनाले सेवा लिएका छन्।

चण्डीस्थान स्वास्थ्य चौकीमा शनिवार  सञ्चालन गरिएको शिविरमा पाठेघरको नि:शुल्क परीक्षण गराएका मध्ये एक जनामा अर्बुदरोग र अर्को एकको पाठेघरमा ट्युमरको समस्या देखिएको जिल्ला सामुदायिक अस्पतालका स्त्रीरोग विशेषज्ञ डा. हेमा छन्त्यालले जानकारी दिए।

चिकित्सकका अनुसार ३० मा पाठेघरको मुखमा घाउ र १० मा पाठेघर खस्ने समस्या भएको पाइएको छ। शिविरमा चार जनाको पाठेघरमा ‘रिङ प्रेसरी’ राखिएको छ। शिविरमा चिकित्सक छन्त्याल, स्वाथ्यकर्मी सुशीला रिमाल र संगीता भण्डारी, चण्डीस्थान स्वास्थ्य चौकीका अनुपमा रेग्मी र अशोक तामाङले सेवा दिएका थिए।

वडाभित्रका महिलालाई सेवा दिने उद्देश्यले सामुदायिक सेवा सिकाइ परियोजनाअन्तर्गत स्थानीय चण्डेश्वरी, चनौटे र सहयोगी स्काइ क्लबले शिविर आयोजना गरेका हुन्।

शिविर वर्ल्ड भिजन इन्टरनेसनल नेपाल र जनचेतना अभिवृद्धि तथा विकास अध्यान समिति (कोपाडेस) को आर्थिक सहयोग तथा बेँसीशहर नगरपालिका–६ वडा कार्यालय र चण्डीस्थान स्वास्थ्य चौकीको समन्वयमा सञ्चालन गरिएको वडाध्यक्ष भोजबहादुर रिमालले बताए।

ग्रामीण भेगमा अधिकांश महिला समस्या भएर पनि लुकाएर राख्ने हुनाले महिलालाई स्थानीयस्तरमै सेवा दिने उद्देश्यले शिविर आयोजना गरेको जानकारी दिए।