हेल्थ टिभी अनलाइन\भक्तपुर : खरिपाटी र नगरकोटस्थित ‘क्वारेन्टाइन’मा राखिएका १९३ नेपालीको स्वास्थ्य परीक्षण एवं नाक र घाँटीको स्वाब संकलन गरिएको छ।

विद्युत् प्राधिकरण भवनमा राखिएका १७५ र नगरकोटको खानेपानी तालिम केन्द्रमा राखिएका नेपाल वायुसेवा निगमको जहाजका चालक दलसहित १८ जनाको स्वास्थ्य परीक्षणका लागि नमुना लिइएको हो। क्वारेन्टाइनमा राखिएको १४औँ दिन शनिवार उनीहरूको नाक र घाँटीको स्वाब नमुना संकलन गरी परीक्षणका लागि पठाएको नेपाली सेनाका सहसेनानी डा‍. नवीन फुयाँलले जानकारी दिए।

यसअघि यही ४ गते नै उनीहरूको नाक र घाँटीको स्वाब संकलन गरी परीक्षण गरिएको थियो। रिपोर्टमा कसैमा पनि कोरोनाको संक्रमण नदेखिए पनि अन्तिमपटक शनिवार फेरि सबैको राष्ट्रिय प्रयोगशालाको टोलीले नाक र घाँटीको स्वाब नमुना संकलन गरी परीक्षणका लागि लगेको उनले जानकारी दिए।

सङ्कलन गरिने स्वाब नमुना परीक्षणको रिपोर्ट आउन करिब तीन दिन लाग्ने भएकाले परीक्षणको रिपोर्टमा कोरोना सङ्क्रमण भएको नदेखिएमा २१ गते उनीहरूलाई घर फर्काउने तयारी गरेको स्वास्थ्य मन्त्रालयले जानकारी दिएको छ।

कोरोना संक्रमणको उद्गमस्थल चीनबाट गत ४ गते नेपालीहरूलाई उद्धार गरी ल्याइएको थियो।