धेरै यात्रुहरूमा नयँ कोरोना भाइरसको संक्रमण अर्थात् कोभिड–१९ भएको पाइएपछि जापानी तटनिर धेरै दिनदेखि क्वारन्टाइननमा राखिएको एउटा क्रुज पानीजहाजका दुई यात्रुको मृत्यु भएको छ।

ती दुई व्यक्ति ८० वर्षभन्दा धेरै उमेरका जापानी नागरिक थिए र उनीहरू पुराना रोगबाट पनि पीडित थिए। कोभिड–१९ भएको पाइएपछि उनीहरूलाई बाहिर अस्पताल लगिएको थियो।

उक्त पानीजहाजमा भएका यात्रुमध्ये कम्तीमा ६२१ जनामा कोरोना भाइरस सङ्क्रमण पुष्टि भएको थियो। त्यहाँ चीनबाहिर एकै ठाउँमा सबैभन्दा ठूलो सङ्ख्यामा मानिसहरूलाई संक्रमण भएको हो। उक्त पानीजहाजमा ३,७०० मानिस सवार थिए।

परीक्षणमा संक्रमण नभएको पाइएका यात्रुलाई १४ दिने क्वारन्टाइननपश्चात् बुधवारबाट बाहिर जान दिइएको छ। बिहीवार पनि यात्रुहरू उक्त जहाजबाट बाहिरिएका थिए। सो पानीजहाजमा संक्रमण फैलिएपछि जापानले त्यसबारे गरेको व्यवस्थापनको आलोचना भइरहेको छ।