हेल्थ टिभी अनलाइन : चीनको वुहानबाट डिसेम्बरदेखि शुरु भएको कोरोना भाइरसका कारण मृत्यु हुनेको संख्या एक हजार ७७० पुगेको छ। चीनको राष्ट्रिय स्वास्थ्य आयोगले फेब्रुअरी १६ सम्म एक हजार ७७० जनाले ज्यान गुमाएको जनाएको हो।

आइतबार मात्रै १०५ जनाले ज्यान गुमाएको आयोगले जनाएको छ। यसैगरी एक हजार ४२५ बिरामी उपचारपछि आइतबार घर फर्केका छन्। यसैगरी दुई हजार ४८ जना नयाँ बिरामी फेला परेका छन्।आयोगले चीनमा कोरोनाबाट मृत्यु हुनेको संख्या घट्दै गएको पनि जनाएको छ ।

आयोगको तथ्यांकअनुसार हालसम्म ७० हजार ५४८ चिनियाँ नागरिकमा कोरोना भाइरस भएको प्रमाणित भइसकेको छ। उनीहरूमध्ये दश हजार ८४४ जना उपचार पछि निको भएर घर फर्केको जनाइएको छ। बाँकी भने अस्पतालमा उपचारमै छन्।

हुबेई प्रान्तका लगभग पाँच लाख मानिस कोरोना भएका व्यक्तिको नजिक भएको हुनसक्ने भन्दै उनीहरुलाई निगरानीमा राखिएको आयोगले जनाएको छ।

नेपालमा भने हालसम्म एक जनामा मात्र कोरोना भेटिएको थियो। उनी पनि उपचारपछि घर फर्केका छन्। यसैगरी आइतबार मात्रै चीनको वुहानबाट १७५ जना नेपालीलाई उद्धार गरी भत्तपुरको खरिपाटीमा क्वारेन्टाइनमा राखिएको छ । उनीहरु सबै स्वस्थ रहेको स्वास्थ्य मन्त्रालयले जनाएको छ ।