ताप्लेजुङ : गाउँका अधिकांश स्वास्थ्य संस्थाबाट सेवा प्रवाह गर्न अप्ठ्यारो भएपछि सिरिजंघा गाउँपालिकाले करारमा स्वास्थ्यकर्मी भर्ना गरेको छ।

गाउँपालिकाले एक स्टाफ नर्स, आठ अहेव, सात अनमी र छ हेल्थ असिस्टेन गरी २२ स्वास्थ्यकर्मी नियुक्त गरेको हो। कर्मचारी समयोजनसँगै स्वास्थ्यका कर्मचारी अन्यत्रै गएपछि अधिकांश स्वास्थ्य संस्था बन्द हुने अवस्थामा पुगेका थिए।

सरकारले कर्मचारी नपठाएपछि करारमा कर्मचारी नियुक्त गरेको गाउँपालिका अध्यक्ष टीका गुरुङले जानकारी दिए। ‘लामो समयदेखि कर्मचारी छैनन्, गाउँका स्थास्थ्य संस्था कर्मचारीविहीन हुँदा नागरिक सामान्य उपचारबाट समेत वञ्चित हुने अवस्था आयो’, उनले भने, ‘त्यसैले सरकारको दायित्वअन्तर्गत रहेर करारमा कर्मचारी नियुक्त गरी पदपूर्ति गरेका हौँ।’

जिल्लाका अन्य गाउँपालिकामा समेत स्वास्थ्यका कर्मचारीको अभाव देखिएको छ। समायोजनपछि सबै कर्मचारीले सुगम रोजेर हिँडेपछि जिल्लाका स्वास्थ्य संस्थामा पर्याप्त कर्मचारी छैनन्। पर्याप्त कर्मचारी नहुँदा सेवाग्राहीले सास्ती बेहोर्दै आएका छन्।