बुटवल : लुम्बिनी प्रादेशिक अस्पताललाई सुविधासम्पन्न अस्पतालका रूपमा विकास गर्ने योजना अघि बढ्ने भएको छ। प्रदेश सरकारले पहिलो चरणमा अस्पतालले निर्माण गरेर व्यावसायिक रूपमा भाडामा लगाएका सटर भत्काएर बाहिरी पर्खाल लगाउने काम अघि बढाउन शुरु भएको हो।

यसअघि प्रदेश सरकारको गत कात्तिक १८ गतेको मन्त्रिपरिषद् बैठकले मंसिर महिनाभर व्यवसायीलाई सटर खाली गर्न सूचना गरेको थियो। यसअघि लुम्बिनी प्रादेशिक अस्पतालले साउन ३० गते सटर खाली गर्न तीन महिने सार्वजनिक सूचना जारी गरेको थियो।

अस्पताल प्रशासनले आज बिहान ६ बजेबाट भत्काउन शुरु गरेको हो। सटर व्यवसायीले अटेर गरेपछि लुम्बिनी प्रादेशिक अस्पताल बुटवलका व्यावसायिक सटर डोजर लगाएर भत्काइएको हो। अस्पतालको पूर्व र उत्तरतर्फ ७३ वटा सटरमा व्यावसायिक मेडिकल तथा अन्य व्यवसाय सञ्चालनमा रहेका थिए।

अस्पतालकाे स्तरोन्नति गर्न गुरुयोजना निर्माण गरेर काम अघि बढाउने प्रक्रिया शुरु भइसकेकाले छिट्टै नै अस्पतालको बाहिरी पर्खाललगायत अन्य पूर्वाधार निर्माणको काम सम्पन्न हुने अस्पताल विकास समितिका अध्यक्ष सूर्यबहादुर भट्टराईले जानकारी दिए।

प्रदेश सरकारले लुम्बिनी प्रादेशिक अस्पतालको स्तरोन्नतिको योजनालाई प्रदेशको गौरवको योजनाका रूपमा अघि बढाउने निर्णय गरेको छ। अस्पतालमा विशेषज्ञ स्वास्थ्य सेवा (क्याथल्याब, न्युरो सर्जरी, क्यान्सर उपचार, अर्गान ट्रान्सप्लान्टेशनलगायत) विस्तार गर्ने प्रदेश अस्पताललाई ‘रिफरल’ अस्पतालका रूपमा सञ्चालन गर्ने सरकारको योजना छ।

सर्वोच्च अदालतले लुम्बिनी प्रादेशिक अस्पतालका सटरहरू नभत्काउन अन्तरिम आदेश जारी गरेको थियाे। सटरहरू नभत्काउन अन्तरिम आदेश जारी गरेसँगै सर्वोच्चले  व्यवसायी र अस्पताल प्रशासनलाई फागुन १ गते छलफलका लागि बोलाएकाे छ।

रासस