काठमाडौं:  नेपाल चिकित्सक संघको निर्वाचन आज सकिएको छ । चिकित्सकहरुको साझा संस्था नेपाल चिकित्सक संघको नयाँ कार्यसमितिका लागि शुक्रबारदेखि शुरु भएको मतदान आज ४ बजे सम्पन्न भएको हो।

मतदानका लागि संघको बागबजारस्थित केन्द्रीय कार्यालय भवनलाई केन्द्र तोकिएको थियो । उपत्यकामा ५ दिनसम्म चलेको मतदानमा जम्मा ३ हजार ३ सय १ जनाले मतदान गरेको प्रमुख निर्वाचन अधिकृत डा बाबुराम मरासिनीले बताए ।  उनले मतगणना भने बुधबार बिहान ९ बजेदेखि हुने जानकारी दिए।

उपत्यकाबाहिरको हकमा यसअघि नै माघ ४ र ५ गते संघका १६ शाखामा मतदान भइसकेको छ । उपत्यकाबाहिर २ हजार ८ सय ५१ मत खसेको थियो । उपत्यका बाहिर र उपत्यकासहित जम्मा ६ हजार १ सय ५२ मत खसेको छ ।

संघको नयाँ कार्यसमितिका लागि दुई वटा प्यानल चुनावी मैदानमा छन्। लोकतान्त्रिक समूहको नेतृत्व डा लोचन कार्कीले गरेका छन भने पेशागत समावेशी समूहको नेतृत्व डा पुष्पमणी खरालले गरेका छन्। १३ सदस्यीय कार्यसमितिका लागि ३० जना चिकित्सक चुनावी प्रतिष्पर्धामा छन्।