संखुवासभा : सिलिचोङ गाउँपालिकामा निर्माणाधीन आयुर्वेद औषधालयको भवन अलपत्र छ। गलत डिजाइनका कारण भवन निर्माण अलपत्र भएको हो। वडा नं १, २ र ३ को संगमस्थल सिसुवाटार बुधबारेमा बन्दै गरेको भवन अलपत्र भएपछि पुरानाे भवनबाट सेवा दिने गरिएको छ।

निकै पुरानो र भत्किँदै गरेको सानो घरबाट सेवा सञ्चालन गरिएको छ। स्वाथ्यकर्मी पुरानो भवनको ठाउँठाउँमा कार्टुनले टालेर  बस्दै आएका छन्। जीर्ण भवनबाट स्वास्थ्य सेवा दिएको वर्षौँ बितेको स्थानीयवासी बताउँछन्।

औषधालयको पुरानो भवन छेउमा नयाँ बनाउन शुरु गरिएको छ वर्ष बिते पनि पिल्लर उठाउनुबाहेक थप प्रगति हुन सकेको छैन। २०७१ मा तत्कालीन आयुर्वेद विभागबाट जिविस हुँदै ४० लाख रुपैयाँबाट केही पिल्लरमात्र ठड्याइएको हो।

प्राविधिक कारणले भवन निर्माणले पूर्णता नपाएको गाउँपालिकाका अध्यक्ष राम कुलुङले बताए। आयुर्वेद औषधालयमा एक कविराजसहित तीनजनाको दरबन्दी छ।