चितवन : भरतपुर अस्पतालले नियमित औषधि सेवन गर्नुपर्ने बिरामीलाई एकै पटकमा तीन महिनाको औषधि दिन शुरु गरेको छ।

स्वास्थ्य बिमा गरेर अस्पताललाई पहिलो बिन्दु छानेका बिरामीलाई लक्ष्य गर्दै सो व्यवस्था गरेको बताइएको छ। मधुमेह, उच्च रक्तचाप, दम, हाडजोर्नी, कोलस्ट्रोल र थाइराइडजस्ता समस्या भएका बिरामीलाई औषधि दिन थालिएको हाे।

यसअघि एक पटकमा एक महिनाका लागि मात्र औषधि दिने गरिएको थियो। मेडिकल सुपरिटेन्डेन्ट डा. श्रीराम तिवारीले बिरामीलाई सहज होस् भन्ने उद्देश्यले तीन महिनाको औषधि एकैपटक दिन शुरु गरिएको जानकारी दिए।

नियमित स्वास्थ्य परीक्षण गर्नुपर्नेबाहेकलाई यसबाट सहज हुने जनाइएको छ। अस्पतालका सूचना अधिकारी लिलाधर पौडेलका अनुसार चितवन र छिमेकी जिल्लाका सर्वसाधारणले जीवन बिमा गर्दा पहिलो बिन्दु भरतपुर अस्पताललाई रोजेका छन्।

भरतपुर अस्पतालमा दैनिक सरदर एक हजार ३०० बिरामी बहिरंग सेवामा उपचारका लागि आउने गर्छन्। तीमध्ये आधा बिमा गरेका बिरामी हुन्छन्। बिमामा आउनेमध्ये ५० प्रतिशत हाराहारी नियमित औषधि सेवन गर्ने गरेको अस्पतालले जनाएको छ।