मुगु : समयमै स्वास्थ्य संस्था पुर्याउन नसक्दा छायानाथ रारा नगरपालिकाकी एक सुत्केरीको मृत्यु भएको छ। छायानाथ रारा नगरपालिका–१० जिउला गाउँकी ३५ वर्षीया धनरूपा विकको मृत्यु भएको हो।

सुत्केरी भएर अत्यधिक रक्तश्रावका कारण बुधबार बिहान उनको मृत्यु भएको हो। उपचारका लागि उनलाई जिल्ला अस्पताल लैजान एम्बुलेन्स र स्वास्थ्यकर्मीलाई सम्पर्क गर्न नसक्दा उपचार नपाएर उनको ज्यान गएको श्रीमान् रामबहादुर विकले बताए।

‘‘घरमै सुत्केरी भएपछि अत्यधिक रक्तश्राव भएपछि अस्पताल पुर्याउन नगरपालिका र जिल्ला अस्पतालका एम्बुलेन्सलाई खबर गर्न खोज्यौँ, उनले भने, ‘मोबाइलको टावर नहुँदा सम्पर्क हुन सकेन, बोकेरै अस्पतालमा लैजाँदै गर्दा बाटोमै मृत्यु भयो।’ आमाको बाटैमा मृत्यु भएपछि नवजात शिशुको बिचल्ली भएको छ।

लगातारको हिमपातले एक सातादेखि मुगु र हुम्ला जिल्ला सञ्चारविहीन भएको छ। मृतक विकको गाउँबाट जिल्ला अस्पताल तीन घण्टाको पैदल दूरीमा टाढा छ। विकले यो पटक पाँचौँ सन्तान जन्माएकी हुन्।