काठमाडौं : चक्रवती हबी एजुकेशन एकेडेमी कलेज अफ नर्सिङ साइन्स कलेजका नर्सिङ विद्यार्थीहरूले आत्मदाहको चेतावनी दिएका छन्।

कलेज खारेजीमा परेपछि आफूहरूको भविष्य अन्धकारमा परेको भन्दै उनीहरूले प्रशासनिक केन्द्र सिंहदरबार अगाडि आत्मदाहको चेतावनी दिएका हुन्।

पीडित विद्यार्थी संघर्ष समितिले मंगलबार रिपोर्टर्स क्लबमा गरेको पत्रकार सम्मेलनमा विद्यार्थीहरूले आन्दोलनको घोषणा समेत गरे। समितिकी संयोजक अनुष्का चौलागाईँले नर्स बन्ने सपना बोकेर दुर्गम ठाउँबाट आएका ३० जनाको भविष्य अन्योलमा परेको बताइन्। सीटीईभीटीदेखि शिक्षा मन्त्रालयसम्म धाउँदा पनि परीक्षा दिन नपाएपछि दुई वर्षको अध्ययन खेर गएको उनको गुनासो छ।

मापदण्ड पूरा नगरेको भन्दै सीटीईभीटीले २०७५ सालमा क्रवती हबी एजुकेशन एकेडेमी कलेज अफ नर्सिङ साइन्स कलेज सम्बन्धन खारेज गरेको थियो। सञ्चालकबीच विवाद भएपछि सर्वोच्च अदालतले कलेज बन्द गर्न आदेश दिएको थियो।

परीक्षा दिन नपाएर पीडामा परेका ३० जना विद्यार्थी पत्रकार सम्मेलनमा  उपस्थित थिए।