काभ्रे : चौरीदेउराली गाउँपालिका–५ भालचौरमा १५ शय्याको अस्पताल निर्माण शुरु भएको छ। प्रदेश ३ सरकारको आर्थिक सहयोगमा नयाँ भवन निर्माणकार्य शुरु गरिएको हो।

साविक धुसेनी शिवालय स्वास्थ्य चौकीकाे स्तरोन्नति भई १५ शय्याको अस्पताल बन्ने भएको हो। २१ रोपनी जग्गामा अस्पताल भवन बन्न लागेकाे हाे।

चौरीदेउराली गाउँपालिकाका प्राविधिक कृष्ण भण्डारीका अनुसार चार करोड २५ लाख रुपैयाँमा ठेक्का सम्झौता भएको सो भवन अहिलेका लागि एक तलाको बन्नेछ । वडाध्यक्ष राजकुमार गौतमले निर्माणको तीव्र भइरहेको र अस्पतालका लागि चिकित्सक नियुक्ति प्रक्रिया अघि बढेको बताए।

गत कात्तिक २५ गते प्रदेश ३ का सामाजिक विकासमन्त्री युवराज दुलालले भवन शिलान्यास गरेका थिए। अस्पताल बनेपछि गाउँपालिकालगायत आसपास रहेका भुम्लु गाउँपालिका, रामेछाप र दोलखाका बासिन्दालाई समेत सेवा पुग्ने जनाइएको छ।