सोलुखुम्बु : जिल्ला अस्पताल फाप्लुमा करिब तीन हप्तापछि चिकित्सक पुगेका छन्। सोलुदूधकुण्ड नगरपालिकाले छ महिनाका लागि चिकित्सकको व्यवस्था गरेको जनाएको छ।

नगरपालिकाले नियुक्त डा. स्मृति गौतमले आइतबारदेखि सेवा थालेको अस्पतालले जनाएको छ। अस्पतालमा चिकित्सक आएसँगै उपचारका लागि बाहिर जानुपर्ने अवस्था अन्त्य हुने स्थानीय बासिनदा बताउँछन्। गाउँका स्वास्थ्यचौकीद्वारा  सिफारिश गरिएका बिरामी  जिल्ला बाहिर जानुपर्ने अवस्था थियो।

कुनै बेला बिरामीले खचाखच भरिने अस्पतालमा अहिले भर्ना हुनेको संख्या शून्य छ भने ओपीडी सेवा लिनेको सङ्ख्यासमेत ५० प्रतिशतले घटेको छ।

नगरपालिकाले चिकित्सकको व्यवस्था गरेसँगै अब त्यसको समेत अन्त्य भएको माप्यदूधकोशी गाउँपालिका–३ बाट आउनुभएका मनिष शासंकरले शताए।

समायोजनसँगै चिकित्सक अभाव

स्वास्थ्यकर्मीको समायोजनसँगै जिल्ला अस्पतालमा चिकित्सक अभाव भएपछि यहाँका सर्वसाधारणले सास्ती खेप्नुपरेको छ। कुनै समय ११औँ तहका चिकित्सकसहित ३५ दरबन्दी रहेको जिल्ला अस्पताल प्रदेश सरकार मातहतमा गएपछि नवौँ तहका चिकित्सकसहित १८ दरबन्दीमा खुम्चिएको छ। प्रदेश सरकारले समेत नवाैँ तहका सहित दुई चिकित्सक यही हप्ताभित्र पठाइसक्ने जनाएको छ।

माथिल्लो तहका सबै चिकित्सक करारमा हुने र तल्लो तहका कर्मचारी दरबन्दीको हुँदा कसको नेतृत्व रहने भन्ने अझै अन्योल छ ।