भारतको केन्द्रीय राजधानी दिल्लीमा सोमबार पनि वायुको अवस्था अति प्रदूषित छ।

सोमबारसहित लगातार पछिल्ला चारदिन दिल्लीको वायु अति प्रदूषित अवस्थामा रहेको अधिकारीहरूले जनाएका छन्।

वायु गुणस्तर तथा मौसम पुर्वानुमान र अध्ययन विभागका अधिकारीहरूले एयर क्वालिटी इन्डेक्स (एक्युआई) ३४२ रहेको जानकारी दिएका छन्।

यसअघि भारतीय प्रधानमन्त्री नरेन्द्र मोदीका प्रधानसचिव पीके मिश्राले भिडियो सम्मेलनमार्फत् प्रदूषणको स्थितिमा दिल्ली, पञ्जाब र हरियाणा सरकारका सम्बन्धित अधिकारीसँग बैठक पनि गरेका थिए। बैठकले प्रदूषणको स्थितिमा लगातार निगरानी राख्ने निर्णय गरेको थियो।

प्रदुषण न्युनिकरणका लागि दिल्लीका विद्यालयहरू बन्द गर्ने घोषणा गरिएको थियो। प्रदूषण न्युनीकरणकै अर्को उपायका रूपमा अघिल्लो सोमबारदेखि दिल्लीमा सवारी साधनका लागि जोरबिजोर प्रणाली लागु गरिएको छ।

जोर बार जोर नम्बर भएका सवारी साधन र विजोर बार बिजोर नम्बर भएका सवारी साधन चल्न दिने व्यवस्था गरिएको थियो। यो नियम चारपाङ्ग्रे निजी सवारी साधनका लागी बाध्यकारी हुनेछ तर सार्वजनिक यातायातका साधन, एम्बुलेन्स, खानेपानी तथा अत्यावश्यक दैनिक उपभोगका सामान ढुवानी गर्ने गाडीका लागी नियम बाध्यकारी नहुने बताइएको छ।

जोर विजोर प्रणाली यही १५ नोभेम्बरसम्म लागु हुने अधिकारीहरुले जानकारी दिएका छन् ।