पाकिस्तानमा डेंगुका कारण यस बर्ष १६ जनाको मृत्यु भएको तथ्याङ्क सार्वजनिक भएको छ।

अधिकारीहरूले शुक्रबार दिएको जानकारी अनुसार डेंगुबाट देशभर नौ हजार ६ सय ३४ जना प्रभावित भएका छन्। रोग निगरानी विभागका प्रमुख राना साफ्डारका अनुसार सिन्धमा मात्रै आठ जनाको मृत्यु भएको छ भने इस्लामावाद र बालुचिस्तानमा तीन, तीन जना र पञ्जाबमा दुई जनाको ज्यान गएको छ।

देशभर डेंगुको प्रकोप बढ्दै गएपछि लामखुट्टे मार्ने तथा नयाँ फैलिन नदिने उपायका लागि विभिन्न अभियान चलाइएको छ। अधिकारिक तथ्यांकका अनुसार सन् २०१० देखि अहिलेसम्म पाकिस्तानमा ६० हजार जना बिरामी भएका छन् भने ३५० भन्दा बढीको मृत्यु भइसकेको छ।