भक्तपुर : जिल्लामा दुई साताको अवधिमा १९७ जनामा डेंगु संक्रमण भएको पुष्टि भएको छ। जिल्ला जनस्वास्थ्य कार्यालय भक्तपुरका अधिकृत पार्थमणि न्यौपानेका अनुसार भक्तपुरमा बुधबारसम्ममा १९७ जनालाई डेंगु भएको पुष्टि भइसकेकाे छ।

कार्यालयका प्रमुख कृष्णबहादुर मिजारले देशकै बढी जनघनत्व रहेको भक्तपुरमा डेंगु संक्रमणको उच्च जोखिममा रहेको बताए। जिल्लामा गत भदौ ८ गते पहिलोपटक डेंगु संक्रमितको पहिचान भएको थियो।

कार्यालयका अधिकृत न्यौपानेका अनुसार ज्वरो आउनेबित्तिकै डेंगु रोगको आशंकामा अस्पताल तथा स्वास्थ्य संस्थामा बिरामीको घुइँचो हुने गरेको छ। जिल्लामा सबभन्दा बढी भक्तपुर नगरपालिका क्षेत्रमा डेंगु संक्रमित भेटिएको बताइएको छ।

‘डेंगु फैलाउने लामखुट्टेको खोज र नष्ट गरौँ’ अभियान सञ्चालन गर्नुपर्ने प्रमुख मिजारले बताए। उनले टोल, नगर, विद्यालयलगायतका हरेक क्षेत्रमा यस रोगबारे जनचेतनामूलक कार्यक्रम भइरहेको जानकारी दिए।