काठमाडौं : स्वास्थ्य तथा जनसंख्यामन्त्री उपेन्द्र यादवले डेंगु रोगका कारण आपतकालीन अवस्था घोषणा गर्नुपर्ने अवस्था नरहेको बताएका छन्।

डेंगुले जनमानस त्रसित भइरहे पनि ३ महिनासम्म केही नबोलेका मन्त्री यादवले बुधबार संसदमा विशेष समय लिएर बोल्दै डेंगुले महामारीको रुप नलिएको जीकिर गरे ।

संसदमा सांसदहरुले पटकपटक डेंगुको नियन्त्रण गर्न स्वास्थ्य मन्त्रालयले के गरिरहेकाे छ भनेर प्रश्न गरिहे पनि मन्त्री यादव भने केही बोलेका थिएनन्। यही विषयलाई लिएर उनको राजिनामा समेत माग गरिएको थियो ।

संसदमा मन्त्री यादवले डेंगुको छुट्टै औषधि एवं खोप नभएकाले यसलाई नियन्त्रण गर्न गाह्रो भएको भन्दै डेंगु अहिले भने कम हुँदै गएको बताए । मन्त्री यादवले लामखुट्टेको नियन्त्रण नै यसबाट बच्ने  सबैभन्दा  उत्तम उपाय भएको बताए । लामखुट्टे  र यसकाे  लार्भा खोज्ने र नष्ट गर्ने उपाय नै संसारभर चलनमा रहेकाले मन्त्रालयले पनि यो अभियान चलाइरहेको समेत उनले जानकारी दिए ।

विकसित देशमा समेत डेंगुले सताइरहेको भन्दै यसलाई नियन्त्रण गर्न स्वास्थ्यकर्मीहरुले हरसम्भव प्रयास गरिरहेको उनले जानकारी दिए । सरकारी तथ्यांक अनुसार वैशाख यता डेंगुका कारण नौ हजारभन्दा बढी मानिस संक्रमित भएका छन् भने ७ जनाको मृत्यु भइसकेको छ ।