२५ भदौ २०७६ , बुधबार

सुत्केरीलाई एम्बुलेन्स भाडा

मेलम्ची : बाह्रबिसे नगरपालिकाले सुत्केरी हुने महिलालाई एम्बुलेन्स भाडा उपलब्ध गराउने भएको छ। समयमै स्वास्थ्य संस्थामा पुग्न नसकेर नगरका महिलाले ज्यान गुमाउन नपरोस् भनेर नगरपालिकाले एम्बुलेन्स भाडा दिने योजना अघि सारेको हो।

नगरपालिकाको आकस्मिक कोषबाट एम्बुलेन्स भाडावापतको रकम उपलब्ध गराउने नगरपालिले जनाएको छ। समयमै स्वास्थ्य केन्द्रमा पुग्न नसक्दा कयौँले ज्यान गुमाउने गरेकाले एम्बुलेन्सको भाडा उपलब्ध गराउने निर्णय गरिएको बताइएको छ।

नगरपालिकाका अनुसार बाह्रबिसेदेखि धुलिखेलसम्मका लागि एम्बुलेन्स भाडावापत चार हजार रूपैयाँ उपलब्ध गराइने छ। बाह्रबिसेदेखि काठमाडौँ पुर्याउनुपर्ने सुत्केरीलाई पाँच हजारका दरले एम्बुलेन्स भाडा प्रदान गरिनेछ।

हेल्थ टिभी अनलाइन

हेल्थ टिभी अनलाइन स्वास्थ्य विधामा नेपाली पत्रकारिता इतिहासकै पहिलो श्रव्यदृश्य केन्द्रित मल्टी मिडिया अनलाइन पोर्टल हो। जनस्वास्थ्य समस्या, रोग र उपचार, चिकित्सा विज्ञान र शिक्षा, आयुर्वेद, स्वास्थ्य प्रविधि, प्राकृतिक चिकित्सा, जीवनशैलीलगायतका सवालमा समाचार, टिप्पणी, विचार, विज्ञको राय, अन्तरवार्ता, छलफल र संवादमार्फत विश्वव्यापी रूपमै पाठक, श्रोता र दर्शकलाई सचेत गराउने कार्यमा हेल्थ टिभी अनलाइन कटिबद्ध छ।