भरतपुर अस्पतालमा बिरामीकाे चाप
चितवन : भरतपुर अस्पतालमा आइतबार हालसम्मकै सबैभन्दा बढी बिरामीले बहिरंग सेवामा टिकट काटेका छन्। एक हजार ९२२ बिरामी अस्पताल आएकाेमा ९०० भन्दा बढी मेडिकल विभागका रहेका थिए।
अस्पतालका सूचना अधिकारी लीलाधर पौडेलका अनुसार मेडिकल विभागका लागि टिकट काटेकामध्ये अधिकांश ज्वरोका बिरामी थिए। तीमध्ये धेरैलाई डेंगु र केहीलाई इन्फ्लुएन्जा भएको पौडेलले जानकारी दिए। अस्पतालका मेडिकल विभाग प्रमुख डा. प्रकाश खतिवडाका अनुसार विभागमा पाँच जना मात्र विशेषज्ञ चिकित्सक रहेका छन् ।
नयाँ ९०० र पुराना ३०० भन्दा बढी बिरामी अस्पताल आएपछि चिकित्सकले सबै बिरामी हेर्न नसकेको उनले बताए। बाँकी रहेका १०० जनालाई प्राथमिकतामा राखेर साेमबार परीक्षण गरिएको उनले जानकारी दिए। अहिलेको चिकित्सकको संख्याले यो चाप थेग्न नसक्ने खतिवडाको भनाइ छ।
सामान्य समयमा ४५० हाराहारी नयाँ र १५० पुराना हेर्दै आएकामा एकाएक दोब्बरभन्दा बढी बिरामी थपिएको तर चिकित्सक उही भएपछि अस्पतालमा धान्न मुस्किल परेको खतिवडाको भनाइ छ। चाप निकै बढेका कारण अस्पतालभित्र ‘फिवर क्लिनिक’ सञ्चालन गर्ने विषयमा छलफल भइरहेको उनले बताए।
खतिवडाका अनुसार अस्पतालभित्रका अन्तरंग सेवाका मेडिकल वार्ड र क्याबिन पनि ज्वरोका बिरामीले भरिएका छन्। करीब १२० ज्वरोका बिरामी अस्पतालमा भर्ना भएको बताइएको छ।
जिल्लाका दुई मेडिकल कलेज र २० निजी अस्पताल पनि ज्वरोका बिरामीले भरिएका छन् । स्वास्थ्य कार्यालय चितवनका किट नियन्त्रक राम केसीका अनुसार आइतबार साँझसम्म तीन हजार ४०० जनाको डेंगु परीक्षण गरिएकाेमा एक हजार २०६ जनामा संक्रमण देखिएको छ । डेङ्गुकै कारण जिल्लामा दुई जनाको मृत्यु भइसकेको छ ।
अत्यधिक विषादी राखिएका तरकारी र फलफूलले क्यान्सर भयावह बन्दै : विज्ञ
ई- सिगरेटको आयात तथा बिक्री वितरण रोक्ने व्यवस्था कार्यान्वयन गर्न स्वास्थ्य मन्त्रालयको पत्र
वायु प्रदूषण बढेकाले सावधानी अपनाउन अपिल
औषधीय गुणले भरिपूर्ण सिस्नो
कर्णालीमा पहिलोपटक कम्युनिटी मेन्टल हेल्थ सम्बन्धी अन्तराष्ट्रिय सम्मेलन हुँदै