भक्तपुर : देशभर महामारीका रूपमा फैलिएको डेंगु नियन्त्रणका लागि जिल्लाव्यापी अभियान शुरु गरिएको छ। जिल्ला समन्वय समितिका प्रमुख नवराज गेलालको संयोजकत्वमा प्रजिअ नारायण भट्ट, सुरक्षा निकायका प्रतिनिधि, नगरपालिकाहरुका प्रतिनिधिसहितको छलफलपछि अभियान शुरु गरिएको हो ।

डेंगु रोगबाट बच्न स्वास्थ्य क्षेत्र, विद्यालय, स्थानीय तहलगायत नागरिक समाजबाट साझेदारीमा कार्यक्रम सञ्चालन गर्ने र सामुदायिक तथा निजी विद्यालयहरूमा चेतनामूलक कार्यक्रम गर्ने गेलालले बताए।

जनचेतनामूलक पर्चा, तथा पम्प्लेट तयार गरी सार्वजनिक स्थान, विद्यालयलगायत क्षेत्रबाट वितरण गरी घरघरमा पुर्याउने, सबै सरकारी तथा निजी अस्पतालले डेंगु रोगको उपचारका लागि ‘र्यापिड रेस्पोन्स टिम’ तयार गरी तत्काल काम गर्ने बताइएकाे छ। साथै जिल्ला स्वास्थ्य कार्यालयले एक नगरपालिकामा तीन जनाका दरले स्वास्थ्य क्षेत्रका अधिकृतलाई सहजकर्ताका रूपमा खटाउने भएको छ।

उक्त रोग नियन्त्रणका लागि वरिष्ठ जनस्वास्थ्य अधिकृतको संयोजकत्वमा विभिन्न सरोकारवाला निकायका प्रतिनिधि रहनेगरी जिल्लास्तरीय सो टोली गठन गरेर विभिन्न कार्यक्रम अगाडि बढाइएको कार्यालयका अधिकृत कृष्णबहादुर मिजारले बताए।

सूर्यविनायक नगरपालिकाका प्रशासकीय अधिकृत कमल ज्ञवाली र चाँगुनारायण नगरपालिकाका प्रशासकीय अधिकृत चिरञ्जीवी तिम्सिनाले जिल्लामा महामारीका रूपमा फैलिन नदिन आवश्यक पहल शुरु गरिसकेकोे जानकारी दिए।