बागलुङ : दुवै मिर्गौला काम नलाग्ने भएका बागलुङ नगरपालिका–१० भकुण्डेका एक युवाले सहयोगको याचना गरेका छन्।

वडाध्यक्ष प्रेमबहादुर थापाका छोरा २८ वर्षीय रविन थापाको मिर्गौलामा समस्या देखिएपछि प्रत्यारोपण गर्नुपर्ने भएकाे हो। अंग प्रत्यारोपणका लागि लाखौँ खर्च हुने भएकाले परिवारका सदस्यले सहयोगको याचना गरेका छन् ।

घरको आर्थिक अवस्थाले उपचार गर्ने सम्भव नभएपछि ‘रविन थापा उपचार सहयोग समिति’ गठन गरेर आर्थिक सङ्कलन अभियान थालिएको संयोजक उमेश सर्बुजाले बताए। थापा दुई महिनादेखि काठमाडौँस्थित आरोग्य स्वास्थ्य प्रतिष्ठानमा उपचार गराइरहेका छन्।

उनकाे उपचारका लागि हालसम्म सात लाख रूपैयाँ खर्च भएको र कम्तीमा ३० लाख खर्च लाग्ने भएपछि समितिकाे सहयोगको अभियान थालिएकाे हाे।

श्रीमतीको मिर्गौला प्रत्यारोपण गरेर बचाउन सकिने भएपछि उपचार र प्रत्यारोपण खर्चको खोजीमा लागिएको समितिका सचिव श्याम थापाले जानकारी दिए।