कालिकाेट : पचालझरना गाउँपालिकामा एम्बुलेन्स सुविधा पुगेकाे छ। सर्वसाधारणको उपचारमा सहज पहुँचका लागि गाउँपालिकाले एम्बुलेन्स सेवा शुरु गरेको हो।

दुर्गम क्षेत्रमा आकस्मिक उपचारका समयमा हुन आउने समस्यालाई मध्यनजर गर्दै गाउँपालिकाले जनताको सेवाका लागि एम्बुलेन्स सेवा शुरु गरेको गाउँपालिका अध्यक्ष खड्गराज सेजुवाल बताए।

‘यहाँका मानिसहरुमा अझै पनि अस्पताल पुग्न सहज वातावरण छैन’, उनले भने, ‘स्थानीयवासीको सहजताका लागि एम्बुलेन्स खरीद गरेका हौँ।’ गाउँपालिकाको १२ लाख रूपैयाँ लगानीमा एम्बुलेन्स खरीद गरिएको गाउँपालिकाका अध्यक्ष सेजुवालले बताए।

कर्णाली प्रदेशका मुख्यमन्त्री महेन्द्रबहादुर शाहीले एम्बुलेन्स सेवाको शुभारम्भ गर्दै दुर्गम तथा पिछडिएको क्षेत्रमा स्वास्थ्य सेवा पुर्याउन प्रदेश सरकारले सबै प्रकार सेवा दिन तयार रहेको बताउनुभयो।