डेंगु महामारी नियन्त्रण बाहिर
काठमाडौं : पछिल्लो पाँच वर्षमा नेपालमा डेंगु संक्रमणको दर बढ्दै गएको भन्दै सरोकारवालाहरुले चिन्ता ब्यक्त गरेका छन्। डेंगुबारे जानकारी दिन आइतबार इपिडिमियोलोजी तथा रोग नियन्त्रण महाशाखाले गरेको पत्रकार सम्मेलनमा उनीहरुले डेंगु प्रत्येक वर्ष बढ्दै गइरहेको भन्दै चिन्ता ब्यक्त गरेका हुन्।
नेपालमा सन् २००४ मा पहिलोपटक एक जना विदेशीमा डेंगु फेला परेको थियो । त्यसपछि सन् २००६ मा चितवनका एक जना ब्यक्तिलाई डेंगु भएको थियो । त्यसयता डेंगु प्रत्येक वर्ष बढ्दै गएको पाइन्छ । आर्थिक वर्ष २०७० -७१ मा ३ सय २ जनामा देखिएको डेंगु संक्रमण गत आर्थिक वर्षको अन्त्य सम्ममा ३ हजार ४ सय २५ जनामा देखिएको छ । प्रदेश नम्बर १ मा सबै भन्दा बढी डेंगु संक्रमित पाइएको इपिडिमियोलोजी तथा रोग नियन्त्रण महाशाखाका निर्देशक डा विवेक कुमार लालले बताए । उनले भने, ‘अहिले सम्म बढी प्रदेश १ त्यो पनि सुनसरीमा देखिएको छ । सुनसरीमा मात्रै ३ हजार १ सय ५२ जनामा डेंगु फेला परेको छ ।’
कार्यक्रममा स्वास्थ्य सेवा विभागका महानिर्देशक डा सुशिलनाथ प्याकुरेलले पछिल्लो समय डेंगु नियन्त्रण हुन नसक्नुको कारण संघ, प्रदेश र स्थानिय सरकाबिच तालमेल नहुनु रहेको बताए । उनले भने , ‘पहिले संघमै सबै अधिकार थियो सबै निर्णय छिटो हुन्थ्यो तर अहिले बजेट, अधिकार सबै स्थानीय लेबलमा गएको हामीेले सहयोग मागे मात्र गर्न सक्ने अवस्थामा छौं जसले गर्दा यसको नियन्त्रणमा समस्या आएको छ ।’
हाल सुनसरी, महोत्तरी, सर्लाही, चितवन, कास्की र रुपन्देहीमा डेंगुले महामारीकै रुप लिएको पनि निर्देशक लालले बताए । डेंगु गराउने लामखुट्टे सफा पानीमा बस्ने हुँदा आफना वरिपरी पानी जम्न नदिनु नै यसबाट बच्ने उत्तम उपाय भएको पनि उनको भनाई छ ।
डेंगु ज्वरो एडिस एजिप्टाई जातको पोथी लामखुट्टेको टोकाइबाट मानिसमा सर्ने रोग हो । यो लामखुट्टेले दिनमा मात्र टोक्ने गर्छ ।
गण्डकी प्रदेशको स्वास्थ्य मन्त्रीमा सीता सुन्दास नियुक्त
मातृ तथा नवजात शिशु मृत्युदर घटाउन मिडवाइफको भूमिका महत्वपूर्ण
अत्यधिक विषादी राखिएका तरकारी र फलफूलले क्यान्सर भयावह बन्दै : विज्ञ
ई- सिगरेटको आयात तथा बिक्री वितरण रोक्ने व्यवस्था कार्यान्वयन गर्न स्वास्थ्य मन्त्रालयको पत्र
वायु प्रदूषण बढेकाले सावधानी अपनाउन अपिल