काठमाडौं : शहीद गंगालाल राष्ट्रिय हृदय केन्द्रमा गलत समूहको रगत चढाउँदा मृत्यु भएकी आकृति साहको उपचारमा संलग्न चिकित्सकसँग नेपाल मेडिकल काउन्सिलले स्पष्टीकरण मागेको छ।

सर्लाहीकी ५ वर्षीया आकृतिको मृत्यु पछि घटनाको छानविन गर्न गठित समितिले उनको मुटुको शल्यक्रियाको क्रममा गलत समूहको रगत चढाइएको पुष्टि भएको प्रतिवेदन काउन्सिललाई बुझाएको थियो।

आकृतिलाई गलत समूहको रगत चढाइएको भन्ने पुष्टि भएपछि काउन्सिलले उपचार गर्ने चिकित्सलाई सात दिन भित्र स्पष्टीकरण दिन पत्राचार गरेको काउन्सिल ‘इथिकल कमिटी’ले जनाएको छ।

वैशाख १७ गते गंगालाल अस्पतलमा ओपन हार्ट सर्जरी गर्ने क्रममा आकृतिलाई ‘ओ पोजेटिभ’ समूहको रगत दिनुपर्नेमा ‘ए पोजेटिभ’ रगत चढाइएको समितिले गरेको छानबिनबाट पुष्टि भएको थियो। आकृतिको ओपन हार्ट सर्जरी गरेको एक सातामै मृत्यु भएको थियो ।

आकृतिको उपचारको क्रममा मृत्यु भएकाे समाचार आएपछि नेपाल मेडिकल काउन्सिलले डा. भगवान कोइरालाको नेतृत्वमा छानविन समिति बनाएको थियो।

स्पष्टीकरण आएपछि घटनामा दोषी डाक्टरलाई कारबाहीको प्रक्रिया अघि बढाउने काउन्सिलले बताएकाे छ।