भोजपुर : जिल्लाको पूर्वी क्षेत्रमा रहेको अरुण गाउँपालिका–५ स्थित याकुलाई पूर्ण संस्थागत प्रसूति वडा घोषणा गरिएको छ। वडा क्षेत्रभित्रका सबै गर्भवती महिलाले स्वास्थ्य संस्थामै आएर सुरक्षित प्रसूति गराएकाले ‘पूर्ण संस्थागत प्रसूति वडा’ घोषणा गरिएको हो ।

साविकको याकु गाविस रहेको यस वडाको सामुदायिक भवनमा आयोजित कार्यक्रममा तत्कालीन संविधानसभाका सदस्य लोकमणि ढकालले प्रदेश १ मै पहिलो पूर्ण संस्थागत प्रसूति वडा घोषणा गरे।

आर्थिक वर्ष २०७५\७६ मा ६१ महिलाले स्वास्थ्य संस्थामा आएर सुत्केरी गराएको याकु स्वास्थ्यचौकीका प्रमुख भोजराज भण्डारीले जानकारी दिए। त्यसमा वडा नं. ५ का मात्र ३७ गर्भवतीमध्ये ३६ जनाले यही स्वास्थ्य संस्था र बाँकी एक जनाले धनकुटा अस्पतालमा गएर प्रसूति गराएका थिए।

दक्ष जनशक्ति, भौतिक संरचनालगायतका उपचारका चाहिने सामग्री उपलब्ध भएका कारण विगत १० वर्षदेखि भोजपुरको याकुस्थित स्वास्थ्य संस्था जिल्लामै नमुना स्वास्थ्य संस्थाको रूपमा परिचित छ।