काठमाडाैं : अपराधका घटनामा वैज्ञानिक परीक्षणका लागि स्थापना भएको नेपाल विधि विज्ञान प्रयोगशालाका लागि छुट्टै भवन छैन।

सरकारले प्रयोगशालाका लागि आवश्यक दरबन्दीको व्यवस्था गरिसकेको प्रयोगशालाका निमित्त कार्यकारी निर्देशक वीरेन्द्रराज शाक्यले जानकारी दिए। तर जनशक्तिलाई काम गर्न पर्याप्त स्थान अभाव छ।

सरकारले प्रयोगशालामा गत आर्थिक वर्षमा मात्रै नौ जना प्राविधिक जनशक्ति पठाएको थियो। नयाँ कर्मचारीलाई समेत राम्ररी काम गर्ने वातावरण तयार गर्न नसकिएको उनले बताए।

निमित्त कार्यकारी अधिकृत शाक्यले शिक्षा, विज्ञान तथा प्रविधि मन्त्रालयसँग भवन आवश्यक भएको र त्यसका लागि जग्गाको माग गरेको जानकारी दिए।

प्रयोगशालाले वैज्ञानिक प्रविधिबाट औंठा छाप, रगतमा मदिराको मात्रा, मानिस र जनावरको डीएनए परीक्षणलगायतका कार्य गर्दै आएको छ।

यसअघि नेपाल विज्ञान तथा प्रविधि प्रतिष्ठान (नास्ट) अन्तर्गत रहेको प्रयोगशाला अहिले स्वायत्त संस्थाको रूपमा छ।