काठमाडौं : मे ३१ अर्थात् विश्व धूमपानरहित दिवस नेपालमा पनि विभिन्न कार्यक्रम गरी मनाइँदैछ। विश्व स्वास्थ्य संगठनको आह्वानमा र सदस्य राष्ट्रहरूको संलग्नतामा सन् १९८७ देखि यो दिवस मनाउन थालिएको हो।

विश्व स्वास्थ्य संगठनका अनुसार सुर्ती र सुर्तीजन्य पदार्थ सेवनकै कारण विश्वमा बर्सेनि ७० लाख मानिसको मृत्यु हुन्छ। यो संख्या सन् २०३० सम्म ८० लाख पुग्ने संगठनले जनाएको छ।

विश्वमा हरेक दिन १५ अरब चुरोट र हरेक मिनेट एक करोड खिल्ली चुरोट बिक्री हुने अनुमान गरिएको छ। विश्वमा हरेक आठ सेकेण्डमा एक जनाको मृत्यु सुर्ती सेवनकै कारणले र हरेक १० जनामध्ये एक वयस्कको मृत्यु चुरोट सेवनले हुन्छ।

सन् २०३० सम्ममा चुरोट सेवनले ६ मध्ये एकजनाको मृत्यु हुने विश्वव्यापी अनुमान छ।

नेपालमा सुर्तीजन्य पदार्थ सेवन गर्नेको संख्या यकिन नभए पनि सुर्ती र सुर्तीजन्य पदार्थको सेवनकै कारण हरेक वर्ष २७ हजार भन्दा बढी मानिसको मृत्यु हुने गरेको तथ्या‌ंक छ। नसर्ने रोगहरूको जोखिम बढ्दै जानुको प्रमुख कारण धूमपान रहेको चिकित्सकहरू बताउँछन्।