हेल्थ टिभी अनलाइन \काठमाडौं : कपिलवस्तुको कृष्णनगर नगरपालिकामा फैलिएको झाडापखालाका कारण ३ बच्चासहित ४ जनाको मृत्यु भएको छ । कृष्णनगरमा गत असोज १८ गतेदेखि फैलिएको झाडापखालाबाट ८८५ जना संक्रमित भएकोमा ४ जनाले ज्यान गुमाएको स्वास्थ्य तथा जनसंख्या मन्त्रालयले विज्ञप्ति जारी गर्दै जानकारी दिएको छ ।

आइतबारसम्म ८१९ जना भने उपचारपछि निको भइसकेको पनि मन्त्रालयले जनाएको छ । २५ जना बिरामी भने अहिले पनि त्यहाँका स्थानीय अस्पतालमा उपचाररत रहेका छन्।

मृत्यु हुने ४ जनामध्ये ४५ वर्षीय पुरुष, ७ वर्षीय बालक, ५ वर्षीया बालिका र २ वर्षीय बालक रहेको मन्त्रालयका प्रवक्ता डा कृष्ण पौडेलले बताएका छन्। उनले अहिले स्थानीय सरकार, प्रदेश सरकार, संघीय सरकार, विश्व स्वास्थ्य संगठन तथा अन्य साझेदार संस्थाहरुको साझा प्रयासबाट प्रकोप नियन्त्रणमा भएको समेत जिकीर गरे ।

दूषित पानीका कारण कपिलवस्तुको कृष्णनगर वडा नं ७, ८ र ९ मा असोज १८ गतेदेखि झाडापखाला तथा वान्ताको प्रकोप फैलिएको थियो ।